Оппозициялык саясатчы Алексей Навальныйдын тарапташтары бүткүл Орусия боюнча митинг өткөрүүгө даярданып жатышат

Оппозициялык саясатчы Алексей Навальныйдын тарапташтары бүткүл Орусия боюнча митингдерди өткөрүүгө даярданып жатышат. Бул тууралуу орус басылмалары Навальныйдын аймактардагы штабдарынын жетекчиси Леонид Волковго таянуу менен жазып чыгышты.

Маалыматта нааразычылык акцияларын уюштуруу 23-январга пландалганы жазылган.

"Бардык штабдар өлкө боюнча митингдерди өткөрүүгө даярдыктарды көрө баштады. Алар жаңы соттун болушун күтпөйт. Алексей Навальный тез арада бошотулушу керек", - деп жазган Леонид Волков.

Ал эми Алексей Навальныйдын өзү дагы тарапташтарын митингдерге катышууга чакырган.

"Көчөгө протест көрсөтүп чыккандан коркпогула, силер мен үчүн эмес, өзүңөр жана келечегиңер үчүн чыгып жатасыңар", - деп Навальный Химки шаарынын полиция бөлүмүндө жазылган кайрылуусунда билдирген.

Маалым болгондой, 17-январь күнү Орусиянын Федералдык кызматы тарабынан изделип жаткан Навальный Германиядан Орусияга кайтып келгенде аэропортто кармалган.