Балбак Түлөбаев: "Айдоочуларга жол кирени саат 20:00гө чейин 12 сом кылууну сунуштап көрдүм"

Бишкек шаарынын мэринин милдетин аткаруучу Балбак Түлөбаев маршруттук таксилердин айдоочулары менен жолугушту. Жолугушуудан кийин мэрдин милдетин аткаруучу сүйлөшүүлөр тууралуу буларды билдирди.

"Жол кире акысы 15 сомго көтөрүлсө коомдун аярлуу катмары, окуучулар жана пенсионерлердин мурдагы жол акысы сакталат.

Мен айдоочуларга "саат 20:00гө чейин 12 сом, 24:00гө чейин 15 сом кылгыла" дедим. Бирок алар актабай калат дешти. Жол акысы 15 сом болсун деген сунуш Транспорт жана жолдор министрлигине жөнөтүлөт", - деди Түлөбаев.

Бүгүн, 19-январда саат 14:30да Бишкек шаарынын мэринин милдетин аткаруучу Балбак Түлөбаев маршруттук каттамдын айдоочулары менен жолугушуу өткөрдү. Анда айдоочулар Балбак Түлөбаев менен жолугушуп, жол киренин баасын 10 сомдон 15 сомго чейин, пенсионерлерге 5 сомдон 10 сомго көтөрүүнү суранышты.