"Жылына 400-450 миң сом киреше табам" деген Дамирбек Назаров Жогорку Соттун судьясы болуп шайланды

Дамирбек Назаров Жогорку Соттун судьялыгына талапкерлиги каралды. Анын талапкерлигин президенттин милдетин аткаруучу Талант Мамытов парламентке сунуштаган.

Депутат Дастан Бекешев судьялыкка талапкерге декларациясы тууралуу суроо берди.

"Өзүңүз билгендей бир нече судьяга "мыйзамсыз баюу беренеси менен кылмыш иши козголду. Ошондуктан менде мындай суроо пайда болду, сиз декларация толтургансызбы? Жылдык кирешеңиз канча?", - деди Бекешев.

"Менин Ноокен районунда 2 бөлмөлүү үйүм бар, 17 сотых үлүш жерим бар. Андан сырткары келинчегимдин атында да айрым мүлктөр бар. Мунун баары декларацияда көрсөтүлгөн. Жылдык кирешем 400-450 миң сомду түзөт", - деди Назаров.

Жыйынтыгында 92 депутат Назаровдун талапкерлигин колдосо, 1 депутат каршы болду. Көпчүлүктүн добушу менен Дамирбек Назаров Жогорку Соттун судьясы болуп шайланып, Жогорку Кеңеште ант берди.