Нарында жол кырсыгынын алдын алуу максатында тайгакка каршы 93 тонна инерттик материалдар себилди

Нарындын аймагында жол кырсыктарынын алдын алуу максатында 12 атайын техника тартылып, тайгакка каршы 93 тонна инерттик материалдар себилип, 72 жол жумушчу иш алып барууда. Бул тууралуу Нарын ОИИБинин басма сөз кызматынан билдиришти.

Маалыматка ылайык, бүгүн, 20-январь күнү Нарын облусунун аймагында туруксуз аба ырайынын күтүлүшү менен Кызарт, Долон, Кызыл-Бел, Кара-Гөө жана Кувакы ашууларында жана Бишкек-Нарын-Торугарт унаа жолдорунда унаа каражат кыймылы үзгүлтүксүз улантылууда.

"Ашуу белдерге, кооптуу аймактардагы чукул жерлерге ЖКККБнын кызматкерлери тарабынан посттор уюштурулуп, кырдаал көзөмөлгө алынууда. Жол кайгуул кызматкерлери унаалардын ортосундагы белгиленген аралыкты сактоого жана жол кыймылынын эрежелерин, айрыкча ылдамдыкты так сактоого чакырат", - деп жазылат маалыматта.