"Бишкекти кара түтүн каптап жатканына ЖЭБдин тиешеси бар экени далилденди" дейт депутат

Депутат Марлен Маматалиев Жогорку Кеңештин жалпы жыйынында Бишкек ЖЭБин газга өткөрүү маселесин көтөрдү.

Эл өкүлү өкмөттүн аппарат жетекчиси Алмасбек Абытовго кайрылып, жылуулук сезону башталган учурда ЖЭБди газ менен иштетүү керектигин айтты.

"Бишкекти каптаган кара түтүн бир аз азайып калганын байкадык. Өкмөт келип эле унааларга күнөөнү илип коюп жатасыңар. Мына, күн жылып ЖЭБдин жумушу азайды, Финпол 15 күндөн бери ал жактын ишин иликтеп жатат. Мына ушуга байланыштуу кара түтүн азайып жатат. Бул кара түтүндүн капташына Бишкек ЖЭБинин түздөн-түз тиешеси бар экенин далили. Же 15 күндөн бери шаарда унаа жүрбөй калдыбы? Жылуулук сезонунда ЖЭБди газга өткөрүү боюнча өкмөт программа даярдап жаткан. 3 айга болсо да газга өткөрөлү, чыгымын элге жүктөп койбойлу. Ушуга көңүл бөлүп койсоңор", - деди Маматалиев.