Оштогу музыкалык окуу жайдын кызматкерлери Самара Каримованын директор болушуна каршы акцияга чыгышты

Ош шаарындагы Ниязалы Борошев атындагы мамлекеттик музыкалык окуу жайынын кызматкерлери жаңы дайындалган директорго каршы акция уюштурду. Тагыраагы, акцияга чыккандар Кыргыз Республикасынын Эмгек сиңирген артисти Самара Каримованын аталган окуу жайга директор болушуна каршы.

Ал эми ырчы учурда иш ордунда экенин, иштеп жатканын, баары жакшы экенин айтты.

Самара Каримова 2018-жылы Ош шаарындагы Ниязалы Борошев атындагы Ош мамлекеттик музыкалык окуу жайына жетекчи болуп дайындалып, 1 күндөн кийин кызматтан алынган. Аны кызматка дайындоо боюнча буйрук жокко чыгарылганын ошол кездеги маданият, маалымат жана туризм министри Азамат Жамангулов айткан. Мындан улам ырчы аброюмду, адамдык укугумду тебелеп жумуштан алган деп, Биринчи Май райондук сотуна кайрылып, утуп алганы маалым болгон.

Кийинчерээк, Маданият, маалымат жана туризм министрлиги Биринчи Май райондук сотунун чечимине карата апелляциялык арыз менен Бишкек шаардык сотуна кайрылды. Апелляциялык даттануу түшкөндүгүнө байланыштуу, Биринчи Май райондук сотунун чечими мыйзамдуу күчүнө кире элек. Бул тууралуу Биринчи Май райондук сотунун маалымат кызматы тарабынан белгилүү болду.