Ошто мыйзамсыз салынган имараттар, объектилер бузулууда

Ош шаарынын аймагында көп кабаттуу үйлөрдүн айланасын санитардык тазалоо, көрктөндүрүү жана жашылдандыруу боюнча комплекстүү иш-чаралар жүргүзүлүүдө. Бул тууралуу Ош шаардык мэриясынын басма сөз кызматынан билдиришти.

Маалыматка ылайык, бузулуп жаткан объектилердин көчөсүнө аллея куруу пландалууда.

"Ош шаарынын мэриясынын муниципалдык менчик башкармалыгынын жана Оштогу жашылдандыруу чарба комбинатынын кызматкерлери Салиев көчөсү менен Жийделик көчөсүнүн кесилишинен Касымбеков көчөсүнө чейинки көп кабаттуу үйлөрдүн айланасында мыйзамсыз объектилерди демонтаждоо иштерин жүргүзүп жатышат. Көпчүлүк тургундар жүргүзүлүп жаткан иштерге түшүнүү менен карашып, мыйзамсыз салынган имараттарын бузууга жардам жана колдоо көрсөтүшүүдө.

2021-жылы Салиев көчөсүнө аллея куруу пландаштырылган. Курулуш иштери башталганга чейин негизинен кароосуз калган үйлөрдүн айланасын санитардык тазалоо, мыйзамсыз курулуштар, тосмолор, гараждар, убактылуу соода түйүндөр жана бактар иретке келтирилүүдө", - деп жазылат маалыматта.