Орусияда 8 аскерди атып салган жоокер 24 жылдан ашык убакытка эркинен ажыратылды

Орусиянын Чита шаарындагы аскердик сот 2019-жылы аскердик бөлүктө 8 кызматташын атып салган жоокер Рамил Шамсутдиновду 24 жыл 5 айга күчөтүлгөн режимге түрмөгө кести. Өкүм бүгүн, 21-январда чыкканын орус басылмалары жазып чыгышты.

Маалыматка ылайык, сот каза болгондордун үй-бүлөлөрүнө жана жакындарына 1,3 миллион рублдан 1,5 миллион рублга чейин, мындан сырткары дагы 1,2 миллион рубль өндүрүп берүүнү дайындады.

"Катардагы жоокер Рамил Шамсутдинов 2019-жылдын октябрь айында "Забайкальедеги" аскердик бөлүктө сегиз аскерди атып салган. Каза болгондордун ичинде эки офицер да болгон. Ал эми кылган иши боюнча Рамил Шамсутдинов сот отурумунда кызматташтары аны бир канча күн бою уктатпай кыйнашканын айткан. Каргашалуу окуя болгон күнү аябай уйкусу келгенин, ок аткан маалда, кийин кармалганда да окуяны жакшы түшүнө албай турганын билдирген.

Орусиянын Коргоо министрлиги жоокер ур-токмоктун айынан мындай кадамга барды деген дооматты жокко чыгарган. Шамсутдиновдун атасы аскер жетекчилери армиядагы зомбулук көрүнүшүн жашырып жатат деп айыптаган", - деп жазылат маалыматта.