Ош шаарында көп кабаттуу үйдүн 280 чарчы метр чатырын шамал учуруп кетти

Ош шаарында көп кабаттуу үйдүн 280 чарчы метр чатырын шамал учуруп кетти. Бул тууралуу ӨКМнын басма сөз кызматынан билдиришти.

Маалыматка ылайык, бүгүн, 22-январда саат 9:57де Ош шаарынын Сулайман-Тоо кичи шаарчасынын Урицкий көчөсүнүн тургуну тарабынан Өзгөчө кырдаалдар министрлигинин нөөмөт бөлүмүнө көп кабаттуу турак үйдүн чатыры катуу шамалдан улам бир бөлүгү жерге кулап, бир бөлүгү үйдүн үстүндө асылып жарандарга кооптуу абал жаратып калгандыгы тууралуу маалымат келип түшкөн.

Окуя болгон жерге ӨКМнын Ош шаары боюнча башкармалыгынан 8 адамдан турган 2 куткаруу тобу аталган дарекке 10:20да жетип барып, кооптуу абал жараткан үйдүн чатырын болжол менен 50 чарчы метр жыгач устундуу тунуке менен жабылган чатырды эч кандай зыян келтирбестен жерге түшүрүп, коопсуз жайга коюп беришкендиги жазылат маалыматта.

Жыйынтыгында Сулайман-Тоо кичи шаарчасынын Урицкий көчөсүнүн 15-үйүнүн 280 чарчы метр чатырын шамал учурган.