ЮНИСЕФтин Кыргыз өлкөсүнө "Pfizer" вакцинасын сактай турган муздаткыч алып берүү планы жок экени айтылды

ЮНИСЕФ Кыргыз өлкөсүнө "Pfizer" вакцинасын сактай турган муздаткыч алып бере албайт. Бул тууралуу ЮНИСЕФ уюмунун Кыргыз өлкөсүндөгү өкүлү Кристин Жольм билдиргенин маалымат каражаттары жазып чыгышты.

"ЮНИСЕФ уюму коронавируска каршы эмдөө жаатында COVAX тутумунун алкагында колдоо көрсөтүү үстүндө иштеп жатат. Бул үчүн 2019-2020-жылдары өлкөдөгү вакциналарды сактоого 973 муздаткыч алынган. Ал эми "Pfizer" вакцинасы үчүн зарыл болгон ашыкча муздатуучу жабдууларды азырынча алып берүү планы жок", - деп жазылат маалыматта.

Буга чейин саламаттыкты сактоо министри Алымкадыр Бейшеналиев брифингде вакцинаны сактоочу муздаткыч менен камсыздоо жагынан ЮНИСЕФ жардам берерин билдирген.

Бүгүн, 22-январда коронавируска каршы вакциналарды сактоо үчүн USAID уюму Кыргыз өлкөсүнө муздаткычтарды сатып бербей тургандыгын, вице-премьер министр Эльвира Сурабалдиева өзүнүн социалдык тармактагы баракчасына жазды.