"Үзүлүп кете жаздадым, көп убараландым, ызырындым" дейт 6 айдан бери директорлук кызматты аткарып жаткан Түмөнбай Колдошов

"Окуу жайга директор болуп келгениме алты айдын жүзү болду. Ушул мезгилде ынтымакты, ишенимди, колдоону, жалганды, тоскоолдукту көрдүм. Үзүлүп кете жаздадым, көп убараландым, ызырындым, аны кайра оңдодум. Мени бул жерге тагдыр алып келди, ырас ушундай болгон соң тагдырымдан качпай бетме-бет чыгайын деп чечтим. Алгач кубангандан кийин өкүнгөн күндөрүм көп болду. Алардын баары эми артта калды. Ал эми жасалган иштерди айтсак, эмгек жамааттын, коомчулуктун жардамы менен окуу жайга 826 миң 870 сом өлчөмүндө накталай дагы, материалдык түрдө да жардам келди. Ошонун эсебинен көп жумуштар жасалды. Бир мисал, салтанаттуу жыйындар залына 500 миң сом кетти. Окуу жайдын алдындагы плиталардын үстү тапталып эскирип калганына байланыштуу оодарып чыктык.Ошондой эле аллея сыяктуу кылып жарыктандырдык. Бул үчүн демөөрчүлөргө терең ыраазычылык айтам. Эмгек жамаатта ынтымак болсо, дагы көптү жасайбыз. Өлкөдөгү педагогикалык орто окуу жайлардын сап башына чыгабыз. Эл аралык деңгээлге жетели деген чоң максатыбыз бар",- дейт Колдошов.