Конституциянын жаңы долбоору боюнча Жогорку Кеңеште 90 депутат болот

Конституциянын жаңы долбоору боюнча Жогорку Кеңеште 90 депутат болот. Бул тууралуу конституциялык кеңешменин төрагасы Бекбосун Бөрүбашев жыйында билдирди.

"Конституциянын жаңы долбоору боюнча Жогорку Кеңештин депутаттарынын саны 90 болду. Шайлоо системасы кандай болорун көрсөткөн жокпуз. Бул маселени Жогорку Кеңештин эркине тапшырдык. Анткени бийликтин баарын конституциялык кеңешмеге алып алуу мүмкүн эмес экен", - деди Бөрүбашев.

Президенттин милдетин аткаруучу, Жогорку Кеңештин төрагасы Талант Мамытов 20-ноябрда Конституциялык кеңешме түзүү боюнча жарлыкка кол койгон. Кеңешменин курамына илимий чөйрөнүн, жарандык коомдун, өкмөттүк эмес уюмдардын өкүлдөрү, укук таануучулар, депутаттар, эксперттер жана башкалар кирип, Кыргыз-Орус Славян университетинин эл аралык конституциялык укук кафедрасынын жетекчиси, юридика илимдеринин доктору, профессор - Бекбосун Бөрүбашев жетектеген.