Жалал-Абадда дарыкананы тоноого шектүү жарандар кармалды

Жалал-Абад облустук ички иштер башкармалыгы тарабынан каракчылыкка шектүү жарандар кармалды. Алар шаардагы дарыканалардын бирине киришип, коркутуу жолу менен тоноочулук жасагандыгы тартылып калган видео социалдык тармактарга тарады.

Жалал-Абад ОИИБинин маалыматына караганда, дарыканага кирген жарандар кассадан 10 миң 3 жүз сом жана сатуучунун сумкасынан 500 сому менен кол саатын алышкан. Аталган факты боюнча Кылмыштардын жана жоруктардын бирдиктүү реестрине катталып, жазык кодексинин 202-беренеси ("каракчылыкка") ылайык сотко чейинки өндүрүшкө алынган.

Шектүү катары 2000-жылы туулган Жалал-Абад шаарынын эки жараны кармалган. Алардын жанынан уурдалган нерселер табылып, эки айга камакка алынды.

Шектүүлөрдүн башка кылмыштарга тиешеси бар же жоктугу текшерилип жатат.