Баары көзөмөлдө болушу үчүн: Транспорт министрлигинин жол-курулуш техникаларына GPS навигаторлор орнотулууда

Транспорт жана жолдор министрлигинин алдындагы жол-курулуш техникаларына жана автоунааларга GPS навигаторлорду орнотуу иштери башталды. Бул тууралуу аталган министрликтин басма сөз кызматынан маалымдашты.

Мындай GPS навигаторлорун колдонууга киргизүүнүн негизги максаты - жол куруу жабдууларын пайдалануунун натыйжалуулугун, күйүүчү майдын чыгымдалышын көзөмөлдөө, жол куруу жабдууларын туура эмес пайдаланууну жокко чыгаруу болуп саналары маалымдалат.

"Учурда 150 бирдик жол-курулуш техникасына жана автоунаалар менен шаймандарга GPS навигаторлорун орнотуу иштери жүргүзүлдү. Жалпысынан 440 унаага пландаштырылган орнотуу иштери улантылууда. Жол куруу механизмдери жана жабдуулары жөнүндө маалымат базасы Департаменттин, Транспорт жана жолдор министрлигинин сайтына жайгаштырылат. Мунун бардыгы жол башкармалыктарында техниканын жана жабдуулардын максаттуу колдонулушун контролдоого мүмкүндүк берет. Мындан тышкары, жалпы пайдалануудагы жолдордо авариялык абалда жабдууларды өткөрүп берүү боюнча маалыматка онлайн режиминде мүмкүнчүлүк ачылды" , - деп жазылат маалыматта.