"Жаратылыш газынын баасын төмөндөтүү мүмкүнчүлүктөрү талкууланды". Артём Новиков "Газпром" компаниясынын өкүлү менен жолукту

Премьер-министрдин милдетин аткаруучу Артём Новиков "Газпром" ачык акционердик коомунун төрагасынын орун басары Виталий Маркелов менен жолугушту. Бул тууралуу өкмөттүн басма сөз кызматынан билдиришти.

Маалыматка ылайык, жолугушуунун жүрүшүндө тараптар "Газпром-Кыргызстан" ЖЧКсынын үстүбүздөгү жылга өлкөнү жаратылыш газы менен камсыздоо боюнча инвестициялык программасын ишке ашыруунун жүрүшү жана жаратылыш газынын баасын төмөндөтүү мүмкүнчүлүктөрүн, анын ичинде Бишкек шаарындагы ЖЭБ үчүн атайын тарифти түзүү маселелери талкууланды.

"Өкмөт энергетикалык коопсуздукту камсыз кылуу жана отун-энергетикалык комплексти өнүктүрүү маселелерине өзгөчө маани берет. "Газпром-Кыргызстан" ЖЧКсы - биздин ишенимдүү өнөктөшүбүз. Буга чейин биз бир катар долбоорлорду, анын ичинде социалдык чөйрөнү да ишке ашырганбыз. Биздин эки тараптуу кызматташуубуз мындан ары да конструктивдүү мазмун менен толтурулат деп ишенем", - дейт премьер-министрдин милдетин аткаруучу.

"Газпром" ААКсынын башкармалыгынын төрагасынын орун басары Виталий Маркелов компания өзүнүн негизги иши менен катар өлкөдө спортту өнүктүрүүгө жана билим берүүнү колдоого чоң көңүл буруп жаткандыгын баса белгиледи.

"Биздин компаниянын Кыргыз өлкөсүндө ишке ашырган долбоорлорунун алкагында буга чейин бир катар социалдык жана спорттук объектилер курулган. Алар өлкөнүн жарандарынын кызыкчылыгында ийгиликтүү иштеп жатышат", - деди Маркелов.

Белгилей кетсек, 2016-жылдан бери Бишкек шаарындагы турак-жайларды жана Чүй облусундагы калктуу конуштарды жаратылыш газы менен камсыздоо боюнча толук масштабдуу иштер жүрүп жатат. Бүгүнкү күндө турак-жай конуштарынын 58 пайызга жакыны "Газпром-Кыргызстан" ЖЧКсынын абоненттери.