Улуу Британияда аныкталган коронавирустун жаңы түрү коңшу Өзбекстанга жетти

Коңшу Өзбекстанда Улуу Британиядан чыккан коронавирус инфекциясынын жаңы түрү катталды. Бул тууралуу аталган өлкөнүн Саламаттыкты сактоо министринин орун басары, санитардык-эпидемиологиялык көзөмөл жана саламаттыкты сактоо кызматынын башчысы Баходир Юсупалиевге таянуу менен жергиликтүү басылмалары жазышууда.

Маалыматка ылайык, вирустун жаңы түрү 23-январда үй-бүлө мүчөлөрү менен Дубайдан кайтып келген ташкенттик аялдан табылган. Аэропортто жаранды тестирлөөдө, тест коронавируска оң натыйжа берген. Андан соң бейтап дароо "Тез жардам" кызматы менен жугуштуу оорулар ооруканасына жеткирилген. Ошол эле күнү, бейтап ооруканада текшерүүдөн өтүп, андан вирустун жаңы түрү аныкталган.

Буга чейин Улуу Британиянын бийлиги өлкөдө аныкталган коронавирустун жаңы түрү демейдегиден 70 пайызга көп жугуштуу болушу мүмкүн экендигин айтып, калктан андан этият болууну талап кылган.