Кувейт-Кыргыз аба каттамдарын жандандыруу мөөнөтү жылдырылды

Кувейт-Бишкек-Кувейт жана Кувейт-Ош-Кувейт жаңы аба каттамдарын ачуу мөөнөтү жылдырылды. "Манас" эл аралык аэропортунун маалымат кызматынан билдиришкендей, алгачкы каттам 2-февралга белгиленген Кувейт-Ош-Кувейт каттамы 9-февралга, ал эми Кувейт-Бишкек-Кувейт каттамы 5-февралдан 11-февралга жылдырылды.

"Аталган өзгөрүүлөр Кувейттин "Jazeera Airways" авиакомпаниясынын өкүлү Риза Аль Мусави менен "Манас" эл аралык аэропортунун төрагасы Бактыбек Сыдыков жолуккан соң анык болду. Мындан тышкары эки тараптын өкүлдөрү жаңы каттамдарды ачуу тууралуу актуалдуу маселелерди талкуулашты.

Эпидемиологиялык кырдаал жөнгө салынгандан кийин каттамдардын саны көбөйтүлүп, аптасына 7 жолу учуу белгиленди. Ошондой эле Кувейт-Бишкек-Сиань каттамы боюнча учууларды ачуу пландаштырылып жаткандыгы кошумчаланды", - деп жазылат маалыматта.

Белгилей кетсек, 2020-жылдын март айында коронавирус эпидемиясынан улам "Манас" эл аралык аэропорту аба каттамдарды токтоткон.