Бишкекте конуштардын биринен токтоп турган Хонда Одиссей унаасын уурдай качкан шектүүлөр кармалды

Бишкекте милиция кызматкерлери Хонда Одиссей унаасын уурдай качкан шектүүлөрдү кармашты. Бул тууралуу Биринчи Май РИИБинин кызматкерлери билдиришти.

Маалыматка ылаайык, 29-январь күнү Биринчи Май РИИБине шаар тургуну арыз менен кайрылган. Арызда 29-январь түнү Достук конушундагы үйлөрдүн биринде токтоп турган унаасын белгисиз жарандар уурдап кеткени жазылган.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

"Издөө иш-чараларынын жүрүшүндө кылмышка шектүү катары 2001-жылы туулган эки жаран кармалган. Алар убактылуу кармоочу жайга киргизилип шектүүлөр башка кылмыш фактыларына катыштыгы бар экендигин аныктоо максатында кошумча тергөө иш-чаралары жана ыкчам-издөө иш-чаралары жүргүзүлүүдө", - деп жазылат маалыматта.