Ошто жол эрежесин билбеген жөө жүргүнчүлөргө миң сомдон айып пулдар салынууда

Ош шаарынын аймагында бүгүн, 4-февралдан тартып «Жөө жүргүнчү» аталышындагы түшүндүрүү иш-чарасы өтүп, жол эрежелерин бузгандарга айып пулдар салынууда. Бул тууралуу Ош шаардык милициянын кайгуул кызматынан билдиришти.

Ош ШИИБи боюнча милициянын кайгуул кызматы тарабынан жөө жүргүнчүлөр өтүүчү жайларда түшүндүрүү иштери жүргүзүлүүдө. Соңку учурларда шаар тургундары атайын жолдон өтүүчү жол сызыгы белгиленген жайлардан өтпөй, жолду ар кайсы жеринен кесип өтүп, айдоочуларга тоскоолдук кылып, жол кырсыктарына себепчи болуп калууда.

Мындан улам жол тескөөчүлөр жер-жерлерде түшүндүрүү иштерин өткөрүп жатышат. Иш-чара 3 күнгө созулат. Эгер жөө жүргүнчү жол эрежесин бузуп, жолду туура эмес жерден кесип өтсө бузуулар кодексинин 125-беренеси менен жоопко тартылып, 1000 сом өлчөмүндө айып пул салынат.

Таң эртеден бери 20 жөө жүргүнчүгө айып пулдар салынды.