"ЭЛДИК КАБАРга" жооп: Кадамжайда 2 кыздын буту жанчылган окуя жүк ташуучу унаа бурулган учурда болгон

SUPER.KG порталынын "Элдик кабар" бөлүмүнө Кадамжай районунун жашоочусу кайрылып, аймактагы башы бар, аягы жок зээн кейиткен жолдун видеосун жиберип, андан өтөм деп 2 кыздын буту жанчылып калганын кабарлаган.

Бул боюнча Кадамжай шаарынын мэри Бакыт Бегалиев төмөнкүлөрдү айтып берди. Айтымында, азыркы тапта бул маселени чечүү максатында тиешелүү мекеме өкүлдөрү күжүрмөн иштеп жатат.

"Окуя кечээ, 3-февралда болгон. Негизи жол Транспорт жана жолдор министрлигине карайт жана ал 2012-жылы курулган. Окуя жүк ташуучу унаа бурулган учурда болгон. Анда жолдон 2 кыз өтүп бара жаткан. Азыр бул боюнча милиция кызматкерлери, министрликтин өкүлдөрү жана мэрия биргеликте иштеп жатышат. Азыркы тапта жабыркаган 2 кыз ооруканада", - деди мэр.

Ал эми окуяга күбө болуп, бирок атын атагысы келбеген жаран азыркы тапта жабыркаган кыздардын абалы жакшы экенин айтты. Ал билдирген маалыматка ылайык, кыздар 11-классстын окуучулары. Алар Баткен облусуна караштуу Кадамжай районунун Таш-Дөбө айылынын жашоочулары.