Саясий ишмер Темирбек Асанбеков: "Чечимдер президент тараптан катуу көзөмөлгө алынса, сөзсүз түрдө кардиналдуу өзгөрүүлөр экени иш жүзүндө далилденет". АПТАСОБОЛ

Кечээ, 3-февралда Жогорку Кеңеш Улукбек Марипов баштаган өкмөттүн жаңы курамын жактырды. Президент Садыр Жапаров тийиштүү жарлыкка кол койду. Ошол эле күнү алар парламентте ант беришип, кызматка киришти. Мурда 22 өкмөт мүчөсү болсо, азыр 16 болду. Коомчулукта өкмөттүн курамы кыскартылып, министрликтер, мекемелер бириккени талкуу жаратууда.

Мындан улам SUPER.KG порталы "Өлкөдөгү абалды жакшыртууга өкмөттүк түзүлүштүн кардиналдуу өзгөрүшү өбөлгө боло алабы?" деген собол салды.

Саясий ишмер Темирбек Асанбеков мамлекеттик бийлик институттарынын сапатын жогорулатууга алгачкы кадамдар ташталганын айтты.

"Азыркы аткаруу өкмөттүн курамы Садыр Жапаровдун мамлекетибиздеги бийлик институттарыбыздын сапатын жогорулатууга болгон алгачкы кадамдары. Албетте, бул убактылуу саясий келишимдерге байланыштуу чечимдер, келечекте дагы кадр тандоонун , аймактык реформаларда терең өзгөрүүлөр болорун күтсөк болот. Саясий эрк көрсөтүлүп, жогорку бийлик бутактарында кабыл алынып жаткан чечимдер президент тараптан катуу көзөмөлгө алынса, сөзсүз түрдө кардиналдуу өзгөрүүлөр экени иш жүзүндө далилденет", - дейт ал.