Жалпы 2062 арыз келип түшкөн. Унааны сатып жибергенден кийин деле айып пул сизге келип жатабы?

Милициянын кайгуул кызматы жарандарга унаа сатып алганда ошол замат өзүнө каттатып, же сатып жатканда сатып алган жаранга толук кандуу өткөрүп берүүнү сунуштайт.

Маалыматка ылайык, жарандар мурдагы сатып жиберген унааларын жөн гана келишимдин негизинде саткандыктан ал унаанын документтеги мыйзамдуу ээси болуп калып, аны сатып алгандар тарабынан жасалган жол эрежесин бузгандыгы үчүн айып пул салынып, ал токтомду камтыган кат мурдагы саткан жарандын дарегине барып жатканын айтып, арызданып келгендер көп катталууда.

"Мындай кайрылуулар менен 2020-жылдын 12 ай ичинде 2 миң 62 арыз түшүп, анын ичинен 236 унаанын айдоочулары издөө бөлүмү тарабынан табылып, арыз ээлери менен жолугуштурулган. Анын ичинен 46 унаа сот аткаруу тутумуна жөнөтүлгөн. Калган авто унааларды издөө иштери уланууда", - деп жазылат маалыматта.