Өкмөттүн Баткендеги өкүлү: "Төрт-Гүл каналы Кыргыз өлкөсүнө тийиштүү, ал башка мамлекетке өтүп кетүүсү мүмкүн эмес"

Төрт-Гүл каналы Кыргызстанга тийиштүү, ал башка мамлекетке өтүп кетүүсү мүмкүн эмес жана ага жол берилбейт.

Бул тууралуу өкмөттүн Баткен облусундагы ыйгарым укуктуу өкүлү Жаныбек Жалалов бүгүн, 5-февралда Баткен шаарындагы борбордук мечитте аксакалдар менен жолуккан учурда билдиргенин мекеменин маалымат кызматынан кабарлады.

Маалыматка ылайык, жергиликтүү эл акыркы күндөрү талкуу болуп жаткан Төрт-Гүл каналы боюнча суроо узатышкан. Ыйгарым укуктуу өкүл өз сөзүндө Төрт-Гүл суу сактагычына келген Төрт-Гүл каналы толугу менен Кыргыз өлкөсүнө тийиштүү экенин айткан.

"19 чакырым болгон канал Баткен районунун Ак-Сай айыл аймагында жайгашкан башкы суу бөлүштүрүүчү жайдан башталып, Төрт-Гүл суу сактагычына чейин Кыргыз өлкөсүнүн аймагы аркылуу агып келет. Аталган каналдын башы, башкы суу бөлүштүрүүчү жай, стратегиялык өзгөчө маанилүү объект болгондуктан күнү-түнү Кыргыз өлкөсүнүн ички аскерлери тарабынан кайтарылып турат. Бул объект башка мамлекеттин карамагына өтүп кетүүсү мүмкүн эмес жана ага жол берилбейт", - деген өкүл.

Ошондой эле жалпы элди сабырдуулукка, ынтымакка чакырып, ал эми чек ара маселеси ачык айкын, эл менен биргеликте, макулдашуу жана тынчтык жолу менен чечилерин баса белгилеген.