"Кардарлары келишимдүү экен". АКШда үйсүз жарандардын чачын акысыз кырккан чач тарачтын эмгектери

АКШда чач тарач баш калкалоочу жайы жок, көчөдө күн өткөргөн жарандардын чачын акысыз кыркып берет. Ал "кардарларынын" сүрөттөрүн социалдык тармактагы баракчасына жарыялап келет. Чет элдик басылмалардын маалыматына караганда, чач тарач сүрөттөрдү жөн гана жарыялап койбостон ар бир кардарынын окуясын кыскача баяндап берет.

Көпчүлүктүн ыраазчылыгын алган чач тарач 50 жаштагы Жейсон Шнейдман. Ал өспүрүм кезинде ал баңгиликке берилип, эки жыл көчөдө тентип, туугандары андан баш тартышкан. Кийинчерээк, ал жашоосу мындай нукта улануусун каалабай, жакшы жакка өзгөртөт.

Чач тарач болуп иштеп жүргөн күндөрдүн биринде ал Лос-Анжелестин көчөлөрүнө чыгып, үй-жайсыз адамдардын чачын акысыз кыркып баштаган. Анын мындай демилгеси суроо-талапка ээ болуп, "TheMenGroomer" коммерциялык эмес уюмун негиздөөгө түрткү болгон.

50 жаштагы чач тарачтын командасы муктаж болгондорго чач жасалга гана эмес, тамак-аш, кийим-кече жана дары-дармектерди (кайдыгер эмес жарандардан чогулган каражатка алынат) берип келишет.