Роза Отунбаеванын пенсиясы кайда жумшалары айтылды

"Роза Отунбаеванын демилгеси" эл аралык коомдук фондунун аткаруучу директору Доктургүл Кендирбаева SUPER.KG порталынын "экс-президент Роза Отунбаеванын пенсиясы кайда жумшалып жатат?" деген суроосуна жооп берди. Кендирбаеванын айтымында, Отунбаева мамлекет тарабынан берилген пенсияны өзүнүн жеке кызыкчылыгына коротпойт.

"Коомчулук Роза Отунбаеванын пенсиясынын кайда коротуларына кызыгып көп сурайт. Негизи эже пенсиясын жеке максатта пайдаланбайт. Бул пенсиядан топтоп, 1 миллион сомду Улан Эгизбаев атындагы журналисттик иликтөө фондуна которду. Албетте бул иш-чара коомчулукка деле жашыруун эмес. Долбоордун негизинде журналисттер коррупцияга каршы күрөшүү боюнча иликтөө жасашат. Экинчиден былтыр катуу пандемия болду. Ошондо да пенсиядан топтолгон миллион сом республикалык ковид менен күрөшүү фондуна которулду. 150 миң сом "Ынтымак" обсервациясына берилди. Ал жерде журналист Тынчтык Алтымышев баш болгон адамдар иштеди.

150 миң сом Талас облусуна ковид менен күрөшүү үчүн которулду. Ошондой эле миң бет кап сатып алып коронавирус менен эң көп алышкан Нарын элине жөнөттү. Андан тышкаркы сумманы тынымсыз өзү багып жүргөн таланттуу балдарга коротту. Ал балдардын ата-энелери таштап салган, бирок балдар колдоого муктаж. Аларга да акча которулат. Фонддо да өзгөчө кыйналган адамдарга жардам болуп турат. Бирок тынчтык заманы келип, пандемия бүтсө, агартууну колдоо боюнча айылды агарталы деген жаштарга же билим берүү тармагын колдоого багыттоо ниетинде турат", - деди Кендирбева.

Экс-президент Роза Отунбаевага айына 100 миң сомдон ашуун пенсия чыгат.