Президент Садыр Жапаров өзүнүн сүрөтүн кабинеттерге жана административдик имараттарга илбөөнү сунуштайт

Президент Садыр Жапаров өзүнүн сүрөтүн кабинеттерге жана административдик имараттарга илбөөнү сунуштайт. Бул тууралуу президенттик аппараттын басма сөз кызматынан билдиришти.

Президенттин басма сөз катчысы Галина Байтерек мамлекет башчысынын сүрөтүн илүү маселеси боюнча комментарий берди.

Ал бардык кабинеттерге, мамлекеттик мекемелердин имараттарына элдин биримдигин жана мамлекеттик бийликти туюнтуу максатында өлкө президентинин портретин илип алганга көнүп калышкандыгын белгиледи.

"Президент Садыр Жапаров "жарандарыбыздын турмушун жакшыртуу жаатында азырынча эч нерсе жасай элекмин" деп эсептейт. Андыктан, ал мамлекеттик бийликтин бардык органдарына анын портретин кабинеттерге жана административдик имараттарга илбөөнү сунуштайт. Президент Садыр Жапаровдун пикиринде, мамлекеттүүлүгүбүздү бекемдөөгө жана Кыргыз мамлекетинин социалдык-экономикалык өнүгүүсүнө баа жеткис салым кошкон Жусуп Абдрахманов, Исхак Раззаков сыяктуу көрүнүктүү мамлекеттик ишмерлердин сүрөттөрүн илүү максатка ылайык келет", - деди Галина Байтерек.