Кара-Суу шаарына канализация качан курулары айтылды

Буга чейин Ош облусунун Кара-Суу, Өзгөн, Ноокат шаарларына канализация орнотуу үчүн долбоор бекитилип, ЕБРден каражат бөлүнүп, ал эсепке түшкөндүгү айтылган. Бирок 3 жылдан бери башталбаганы жергиликтүү элдин нааразычылык пикирлерин жаратып келген. Ош облусунун башчысы Жарасул Абдураимов бул маселе боюнча, жыл жыйынтыгын чыгаруу жыйынында жана эл менен жолугушууда элден бир нече жолу кайрылуу келгендигин айтып, Кара-Суу районунун акиминин милдетин аткаруучу К.Адиев баштаган тийиштүү тармак жетекчилери жана эксперттер менен талкуулаган. Бул тууралуу өкмөттүн Ош облусундагы ыйгарым укуктуу өкүлүнүн маалымат кызматы кабарлады.

Маалыматка ылайык, долбоор бүтүп, каражат бөлүнгөн жумуш экология кызматынын уруксаты болбогон үчүн токтоп, ал үчүн банкта кармалып турган каражат үчүн пайыз төлөөгө мажбур болуп жаткандыктары тууралуу айтылган.

"Жарасул Абдураимов Кыргыз Республикасынын өкмөтүнө караштуу курчап турган чөйрөнү коргоо жана токой чарбасы мамлекеттик агенттигинин Ош аймактык башкармалыгына талап койду. "Мындай ири долбоор иштелип жатканда кошо иштеп, жол көрсөтүп, жардам бергиле. Мамлекеттин өнүгүүсү, жарандардын жашоосун жакшыртуу, албетте, жерибиздин экологиясы баарыбызга бирдей керек жана маанилүү. Каражат кетип, убакыт сарпталып, араңдан зорго тапкан каражат кайтып кетсе, түздөн-түз моралдык күнөөкөр болосуңар",- деп билдирди.

Ош облусунун башчысы кайрадан биргелешип иштеп, Кара-Суу шаарынын канализациясы үчүн талаптарга жооп берген жол издеп табуу үчүн бирге иштеп, кайра долбоор сунуштоого 1 ай убакыт берилди", - деди маалымат катчы.