Шашылыш билдирүү! Ашууларга кар көчкү түшүүсү күтүлөт

Бүгүн, 9-февралда жолдор тайгак жана тоңголок болуп, кар күрткүсү күтүлөт. Батыштан соккон шамалдын ылдамдыгы айрым жерлерде секундасына 15-20 метрге жетиши мүмкүн. Бул тууралуу ӨКМнын басма сөз кызматынан билдиришти.

Маалыматка ылайык, абанын температурасы төмөндөшү күтүлөт. Мындай туруксуз аба ырайы унаа, энергетика жана коммуналдык кызматтардын ишин кыйындатат.

"9-10-февралда жаап өткөн жана күтүлүп жаткан жаан-чачынга байланыштуу тоолуу райондордо, Бишкек-Ош унаа жолунун Төө-Ашуу ашуусунда, Ала-Бел ашуусунда, Чычкан капчыгайы, Суусамыр-Талас-Тараз унаа жолунун Өтмөк ашуусунда, Мырзаке-Кара-Кулжа-Алайку унаа жолунда, Ала-Бука-Жаңы-Базар-Кировка Чапчыма ашуусунда жана Красная Горка-Ак-Таш унаа жолунда кар көчкү түшүүcү жана кар күрткүсү күтүлөт. Жолдор тайгак болуп муз тоңот. Унаалардын ортосундагы 500 метр аралык кыймыл чектелиши зарыл", - деп жазылат маалыматта.