Кадамжайда буту жанчылган эки кыздын бирине операция жасалат

Буга чейин SUPER.KG порталынын "Элдик кабар" бөлүмүнө Кадамжай районунун жашоочусу кайрылган. Ал аталган аймактагы жол көйгөйүн айтып, айласыз акыбалга келген жолдун видеосун салып жиберген. Ал аймакта жол кырсыгы катталып, 2 кыздын буту эзилип, жанчылып калганын айткан.

Аталган окуя боюнча Кадамжай шаарынын мэри Бакыт Бегалиев: "Окуя жүк ташуучу унаа бурулган учурда болгон. Анда жолдон 2 кыз өтүп бара жаткан. Азыр бул боюнча милиция кызматкерлери, министрликтин өкүлдөрү жана мэрия биргеликте иштеп жатышат. Жабыркаган 2 кыз ооруканада", - деп билдирген.

SUPER.KG порталы жабыркаган эки кыздын абалын сурады.

Кадамжай шаарынын аймактык ооруканасынын жетекчиси Залкарбек Баймуратов кыздардын абалы тууралуу төмөнкүлөрдү айтып берди.

"Жабыркагандар Элиза Жапарова жана Гүлжахан Имарадилова 2004-жылы туулган. Экөө тең Таш-Дөбө айылынын жашоочулары. Алар Кадамжай шаардык ооруканасына келип түшкөн.

Элиза Жапарованын сол жамбаш сөөгүнүн төмөнкү үчтөн бири жабык сынган. Бүгүн операция жасалып жатат.

Гүлжахан Имарадилова бир күн ооруканада жатып, ата-энесинин каалоосу менен Ошко текшерүүдөн өткөрүү үчүн алып кетишкен. Абалы орто болчу", - деди дарыгер.