Фонд: "Садыр Жапаровго белекке берилген унаа Турдакун Усубалиевге таандык эмес"

Буга чейин президент Садыр Жапаров социалдык тармактагы жеке баракчасына Турдакун Усубалиевдин автоунаасын белекке алганын жазган. Бирок ал белекке алган буюмун таберик катары эсептегендиктен автоунааны музейге тапшырууну ылайык көргөн. Унааны белекке Кочкор районунун Бакай аттуу тургуну берген.

Бул унаа боюнча Турдакун Усубалиевдин фонду маалымат таратты. Фонддун маалыматы боюнча, Кыргыз ССР Компартиясынын Борбордук Комитетинин биринчи катчысында мындай машина болгон эмес. 70-жылдары жогорку даражалуу чиновниктерге берилген бардык белектер катуу көзөмөлгө алынып, бардык мүлктөр каттоодо турган. Бул унаа алардын арасында көрүнбөйт деп жазылат маалыматта.

Турдакун Усубалиев коомдук фондунан билдиргендей, бул унаа эч качан Усубалиевдин менчигинде болгон эмес. Ошондой эле фонддун жетекчилиги Турдакун Усубалиевдин ысымын жеке адамдар коомдук бирикмелер жана уюмдар майда мүлктүк кызыкчылыктарда колдонууга караманча каршы экенин билдиришкен.

Ошондой эле унаа бүгүн Тарых музейине өткөрүлүп берилген.