УКМК: "Муфтияттын бухгалтери өзгөчө ири өлчөмдө пара берип жаткан жеринен кармалды"

Муфтияттын жетекчилиги зыяратчылар тарабынан кошкон акчасын жеке каржы мекемелерине 100 миллион сомдон ашык суммадагы насыяларды берип, ай сайын пайыздык төлөмдөрдү алуу менен өздүк максаттарына жумшагандыгы аныкталды. Бул тууралуу УКМКнын басма сөз кызматынан кабарлашты.

"Ушул каржылык операцияларды ачыкка чыгаргандан кийин Муфтияттын жетекчилиги УКМКнын кызматкерлерине табылган фактыларды жашырганы жана кошумча тергөө иштерин токтоткону үчүн 100 миң АКШ доллары өлчөмүндө пара сунуштаган.

2021-жылдын 9-февралында бул факты сотко чейинки өндүрүшкө Кылмыш-жаза кодексинин 328-беренесинин 3-бөлүгү (Өзгөчө ири өлчөмдө пара берүү) боюнча кылмыштардын жана жоруктардын бирдиктүү реестрине катталды, ошол эле күнү Муфтияттын башкы эсепчиси Ж.Б. УКМКнын кызматкерлерине пара берип жатып кармалган", - деп жазылат билдирүүдө.

Кармалган адам УКМКнын тергөө камак жайынын убактылуу кармоочу жайына киргизилди. Учурда тергөө иштери жүрүп жатат.

Бул боюнча Муфтиятка байланышканыбызда кийинчерээк маалымат беришерин билдиришти.