Өлкөдө кавасаки синдромуна окшош дарт менен күрөшүп жаткан 15 баланын абалы орто оор

Өлкөдө 15 бала кавасаки синдромуна окшош илдет менен жабыркап, дарылануудан өтүп жатат. Бейтаптардын абалы бүгүнкү күндө орто оор деп бааланып жатканын Бишкектеги Эне жана баланы коргоо улуттук борборунун жетекчиси Камчыбек Узакбаев билдирди.

Айтымында, Кавасаки синдрому адамдын бир катар системин жабыркатат, мындан улам ооруну мультисистемдин сезгенүүсү дешет. Иммунитеттин төмөн болушу жана COVID-19 илдетинин жайылышы бул ооруну кабыл алууга шарт түзөт.

"Кавасаки синдромуна окшош илдет менен жабыркагандардын дээрлик баары балдар (2 жаштан 17 жашка чейинкилер). Мультисистемдик сезгенүү балдар арасында көп кездешет. Бул ооруга чалдыккандардын эң биринчиден жүрөк-кан тамыр системи, өпкөсү, ичегилери, борбордук нерв системи, теридеги кан тамыры жабыркап, муундары, булчуңдары ооруйт".

Бүгүнкү күндө жогорудагы илдетке кабылгандарды дарылоо бөлүмү өлкө боюнча бир гана Эне жана баланы коргоо улуттук борборунда бар. Аталган медициналык жайга республиканын бардык аймактарынан келген бейтаптар дарыланууда.

"Бизге келген бейтаптардын ичинен эки баланын абалы өтө оор болчу. Тиешелүү дарылануудан кийин абалдары турукташып калды. Бүгүнкү күндө бардык бейтаптардын абалы орто оор. Жаңы жылдын алдында керектүү дары-дармектерди алып койгонбуз, медициналык каражаттар жетиштүү. Бизге келген балдарды дарылоодон мурда дарыгерлердин консилиуму болот", - дейт адис.

Илдеттин белгилери:

* дене таптын көтөрүлшү;

* дем алуунун кыйындашы;

* денеде кызыл тактардын пайда болушу.

Эгер жогорудагы белгилер байкалса тез арада медициналык жайга кайрылуу зарыл.

Кавасаки синдромуна окшош же мультисистемдин сезгенүүсү менен жабыркаган алгачкы бейтап Кыргыз өлкөсүндө 5-6 жыл мурда катталган.