Кинодраматург жана сценарист Баян Сарыгулов 72 жашында дүйнө салды

Кинодраматург, сценарист Баян Сарыгулов 72 жашында дүйнө салды. Бул тууралуу бүгүн, 11-февралда Кыргыз кинематографисттер департементинен кабарлашты.

Маалыматка ылайык, Баян Сарыгулов кечээ, 10-февралда каза болгон.

Баян Сарыгулов 1949-жылы 21-ноябрда Талас облусунда төрөлгөн. Ал Москва мамлекеттик эл аралык мамилелер институтунун журналистика адистиги боюнча аяктаган, ошондой эле сценаристтердин жогорку курстарын аяктаган.

1993-1999-жылдары Кыргызстан кинематографисттер союзун жетектеген. 2000-жылдардын башында ал "Кыргызстан хроникасы" англис тилинде чыккан гезиттин башкы редактору болгон.

"Кыргызтелефильмдин" башкы редактору да болгон. Ал бул кызматта 2009-2011-жылдары жана 2017-2020-жылдары иштеген.