УКМК: "Кыргызалтын" ишканасынын жетекчиси 100 миң сом пара алып жаткан учурунда кармалды" (сүрөт)

Мамлекеттик органдардагы коррупциялык көрүнүштөрдү аныктоо, алдын алуу жана бөгөт коюу боюнча жүргүзүлгөн иш-чаралардын алкагында "Кыргызалтын" ААК Башкармалыгынын төрагасы У.Э.А. кармалды. Бул тууралуу УКМКдан билдиришти.

Маалыматка ылайык, ал алтын казуучу ишканалардын айрым жетекчилеринен пара талап кылып келген.

"Аталган У.Э.А. алтын өндүрүүчү компаниялардын биринин директорлор кеңешинин мүчөсүн кызматтан алам деген коркутуу менен, эмгек акысынын бир бөлүгүн ага өткөрүп берүүнү талап кылган. 2021-жылдын 12-февралында жүргүзүлгөн ыкчам-тергөө иш-чараларынын натыйжасында, 100 миң сом өлчөмүндө пара алып жаткан учурунда У.Э.А. кармалды.

Учурда, сотко чейинки өндүрүштүн алкагында, "Кыргызалтындын" жетекчиси тарабынан опузалап пара алуу сыяктуу фактыларды аныктоо боюнча иш-чаралар жүргүзүлүүдө. 2021-жылдын 12-февралында Кыргыз Республикасынын Жазык-процесстик кодексинин 98-беренесинин негизинде У.Э.А. Кыргыз Республикасынын Улуттук коопсуздук мамлекеттик комитетинин убактылуу кармоочу жайына киргизилди", - деп айтылат маалыматта.