Китеп белекке берүүнүн бүткүл дүйнөлүк күнүнө карата Ош шаарында китеп той өттү

Китеп белекке берүүнүн бүткүл дүйнөлүк күнүнө карата Ош шаарында китеп той болуп өттү. Бул тууралуу уюштуруучулардын бири Айгерим Нурболотова билдирди.

Билдирүүгө ылайык, аталган иш-чара 14-февраль - Китеп белекке берүүнүн бүткүл дүйнөлүк күнүнө карата Ош шаарындагы тойканалардын биринде 700гө чукул адамдын катышуусунда өттү.

"Иш-чарага экс-министр жана оратор Нуржигит Кадырбеков, Нарын облусунун казысы Мамбетасан Ибраев, Баян Акматов, Самара Сабирова жана Азиз Батыров келип, Ош элине руханий-интеллектуалдык азык тартуулашты. Ошондой эле иш-чара баш казанды, рух казанды, аш казанды биргеликте байытып, келген конокторго ашыкча чыгашасыз сыйлуу тамактар да тартууланды. Китеп майрамына арналып, арзандатуулар менен китеп жарманкеси уюуштурулду.

"Китеп-Той" маданий-интеллектуалдык кечеси аты айтып тургандай эле акындардын айтышы, спектакль, поэзия мүнөттөрү, элдин сүймөнчүгүнө ээ, көрөңгөлүү инсандардан семинар, ата-энени, мекенди сүйүүгө арналган патриоттук ырлар, комуз күүсү, китеп жарманкеси, жаңы чыккан китептердин баяндамасы жана интеллектуалдык оюндар менен коштолду.

Иш-чара элибиздин нукура баалуулуктарын даңазалап, өлкөбүздүн агартуу тармагын өнүктүрүүгө, китеп окуу маданиятын жайылтууга, "Китепкөй өлкөнү" курууга багытталды", - деп билдирди Айгерим Нурболотова.

Белгилей кетсек, "Бир адамдан бир китеп" долбоорунун алкагында уюштурулуп келе жаткан "Китеп-Той" долбоору 2019-жылдан бери борбор калаабыз Бишкек шаарында үч жолу өттү. Ага байланыштуу учурда бул долбоор үзгүлтүксүз уюштурулуп келе жатат.