УКМК: "Чек арадагы тактала элек тилкелерде көчөт отургузуу иштери токтотулду"

Баткен облусундагы Тажикстан менен болгон чек аранын тактала элек тилкесиндеги бардык жумуштар токтотулду. Бул тууралуу Улуттук коопсуздук боюнча мамлекеттик комитетинен билдиришти.

"11-февралда Баткен районундагы Чек-Дөбө аймагында кызмат чек арачылар тарабынан мамлекеттик чек аранын тактала элек тилкесине көчөттөрдү отургузуп жаткан Тажикстандын жарандары аныкталган. Ошол эле күнү түндө белгисиз адамдар көчөттөрдү жулуп салышкан. Тажикстандын жарандары 12-февраль күнү экинчи жолу мамлекеттик чек аранын тактала элек тилкесине көчөттөрдү отургузууга аракет кылышкан. Чек арачылар жумушту токтотуу боюнча мыйзамдуу талап койгондо Тажикстандын жарандары кыр көрсөтүшкөн.

Окуя болгон жерге Тажикстандын аскер кызматкерлери келишти. Учурда эки өлкөнүн чек арачылары өз позицияларын ээлешип, тактала элек аймактагы бардык жумуштар токтотулду", - деп жазылат билдирүүдө.

Учурда мамлекеттик чек аранын кыргыз-тажик тилкесинде абал туруктуу. Баткен облусунда жайгашкан чек ара бөлүктөрүндө күн сайын чек арачылар нөөмөттө турушат.