Жумуш учурунда коронавирус жуктуруп алган мугалимдерге жөлөк пул төлөнө электиги шаардык кеңеште айтылды

Бишкек шаардык кеңешинин туруктуу комиссиясынын бүгүнкү отурумунда мектептерде окутуу калыбына келтирилгенден кийин жумуш учурунда коронавирус жуктуруп алган мугалимдерге кошумча жөлөк пул төлөнө электигине байланыштуу нааразычылыктар айтылды. Бул тууралуу жыйындын төрагасы Казыбек Эргешов отурумда билдирди.

Маалыматка ылайык, туруктуу комиссиянын жыйынында Казыбек Эргешов, оффлайн режиминде иштеген мугалимдерге кандайдыр бир кошумча акы төлөнөбү? деп сураган. Бишкек шаардык билим берүү башкармалыгынын башчысы Элмира Иманалиева кошумча акы бериле электигин билдирди.

“Мектептерде COVID-19 инфекциясы мугалимдерге жуккан фактылар бар. Эмне үчүн тобокелдик аймактарында иштеген дарыгерлерге кошумча акы төлөнөт, ал эми мугалимдерге жок? Каттарды даярдап, жумушчуларыңардын укугун коргогула”, - деди Казыбек Эргешов.