2 жашында атасынын бир тууган агасы тарабынан кордук көргөн Ибрагим эсиңиздеби? Ибрагимге үй белекке берилди

2015-жылы атасынын агасы тарабынан комага түшүп калганга чейин сабалган Ибрагимге үй берилди. Бул тууралуу "Рахим" кайрымдуулук фондунан билдиришти.

Азыркы тапта Ибрагимди атасынын мурдагы аялы Диана Сайимова карайт. Ушул күнгө чейин бул үй-бүлө турак- жайга өтө муктаж болуп келген. Диана эки баласы менен Бишкектин четиндеги жаңы конуштардын биринде шарты жок кичинекей батирде жашап келген.

“Рахим” кайрымдуулук фонду аларга Көк-Жар кичи районунда жаңы салынган үйдөн ремонттолгон эки бөлмөлүү батирди белекке берди. Үйдүн ачкычын бүгүн, 16-февралда тапшырды.

“Мен бул үй-бүлөгө 2017-жылдын май айынан бери каралашып келем. Алар биздин жалгыз бой энелерди колдоо программасына кошулуп, ай сайын 5000 сомдон алып турушат. Ибрагимдин жан кейиткен тагдырын укканымда четте туруп кала албадым", - дейт фонддун директору Айдар Окенов.

Учурда Ибрагим 8 жашка толду. Ал мамлекеттен 8900 сом материалдык жардам алат.

2015-жылдын 11-январына караган түнү шаардагы балдар ооруканасына 2 жашар бала оор абалда жеткирилген. Анын денесинде көптөгөн жаракаттар болгон. Соттук-медициналык экспертиза анын зордукталганын аныктаган.