13 күн мурун ишке киришкен өкмөт башчы мамлекеттик кызматкерлердин ишине нааразы болду

Социалдык тармакта түз эфирге чыккан премьер-министр Улукбек Марипов өкмөт мүчөлөрүнө, мамлекеттик кызматкерлерге кайрылды.

"Эмне үчүн бардык маселелер өкмөткө келип такалат. Себеби жер-жерлерди тийиштүү жетекчилер, аймактардагы жетекчилер жана башка агенттиктин жетекчилери өз тармактарында, өз убагында маселелерди чечпегендиктен жарандарыбыз социалдык тармак аркылуу, кагаз жүзүндө аргасыздан бизге кайрылып жатышат.

Ошон үчүн урматтуу жетекчилер, учурдан пайдаланып айтып кетейин, сиздер тараптан коомчулук менен болгон байланыш жакшы эмес. Начар деп айтсак болот. Ошондуктан төгөрөктүн төрт бурчунан жарандарыбыз ушул жакка чейин келип жатат.

Өкмөттүк деңгээлдеги маселелерди колдон келишинче чечип жатабыз. Ар бир тармак өзүнө тиешелүү көйгөйлөрдү чечиши керек", - деди Марипов.

2-февралда Жогорку Кеңештин тийиштүү комитети өкмөттүн жаңы курамын карап, анда өкмөт башчылыкка Улукбек Мариповдун талапкерлиги жактырылган. Тийиштүү жарлыкка президент Садыр Жапаров кол койгон. 3-февралда Марипов кызматка киришип жатып ант берген.