"Ноутбук, куран китеп, акчалай белек". Интернет жылдызы Бекболот Садыр Жапаров менен онлайн жолугуп, белек алды

Ысык-Көлдүн Балбай баатыр айылына эки кабат мектеп салып бериңиз деп президент Садыр Жапаровго кайрылып интернет жылдызына айланган Бекболот президент менен онлайн жолугушту. Бул тууралуу блогер Азирет Осмонов өзүнүн социалдык тармактагы баракчасы аркылууу видео кайрылууда айтты.

"Бүгүн Бекболот экөөбүз Садыр Нургожоевичке жолукмакпыз. Бирок жолугууга мүмкүнчүлүк болгон жок. Анын бир нече себептери бар. Президентибиз учурда обочолонуу режиминде болуп жаткандыгына байланыштуу көп адамдардын кирүүсүнө тыюу салыныптыр.

Бекболот менен Садыр Жапаров видео чалуу аркылуу сүйлөшүп, президентибиз Москвага болгон иш сапарынан келгенден кийин Бекболотту кабыл ала тургандыгын билдирди", - деди ал.

Мындан тышкары, Садыр Жапаров интернет жылдызына куран китеп, ноутбук жана акчалай сыйлык берген.

Буга чейин интернет жылдызы Бекболоттун президент Садыр Жапаров менен жолугушары тууралуу имиштер тараган. Ал эми президенттик аппарат Садыр Жапаровду Бекболотту кабыл алары тууралуу бүгүн, 16-февралда белгилүү болорун айтышкан.