Азербайжан Карабахтагы согушта каза болгон 106 адамдын сөөгүн Арменияга өткөрүп берди

Шейшемби күнү Азербайжан Арменияга Карабахтагы жаңжалдын курчуп кетишинен улам каза болгон 106 кишинин сөөгүн өткөрүп берди. Бул тууралуу Карабахтын башчысы Араик Арутюнян өзүнүн социалдык тармактагы баракчасына жазды.

"Гуманитардык маселелер боюнча кызматташтыктын алкагында жана Карабахтагы Орусиянын тынчтык орнотуучу күчтөрүнүн ортомчулугу менен Азербайжан тарап 44 күндүк согушта каза болгон 106 адамдын сөөгүн бизге тапшырды", - деп жазды ал.

Анын айтымында,согуш учурунда курман болгон жана балким тирүү калган адамдардын сөөгүн издөө иштери уланууда.

Буга чейин Орусия, Армения жана Азербайжандын лидерлери Карабахта ок атышпоо боюнча биргелешкен билдирүү кабыл алышканы белгилүү болгон. Келишим боюнча 10-ноябрда ок атышуу толугу менен токтогон. Мындан тышкары, Армения Азербайжан тарапка Агдам Кельбажар жана Лачин райондорун өткөрүп берген. Учурда аталган аймактарды Орусиянын тынчтык күчтөрү көзөмөлдөөдө.