"Укмуштуудай хан сарай, 19 унаа". УКМК кримавторитет Женгонун мүлктөрүн жарыялады (сүрөт)

УКМК тарабынан кылмыш жолу менен алынган акчаны легалдаштыруу механизмдерин аныктоого жана бөгөт коюуга багытталган уюшкан кылмыштуулукка каршы күрөшүүнүн алкагында, "Дженго" каймана аты менен белгилүү кармалган криминалдык авторитет К. Досоновго карата, кылмыш-жаза кодексинин 215-беренесинин 3-бөлүмү (Кылмыштуу жол менен алынган кирешелерди легалдаштыруу (адалдоо) кылмыштарынын белгилери боюнча Кылмыштардын жана жоруктардын бирдиктүү реестрине катталып, сотко чейинки өндүрүш иши башталды. Бул тууралуу УКМКдан билдиришти.

"Буга чейин эч жерде иштебеген жана ишкердик менен алектенбеген, бир нече жолу соттолгон К.Досоновдун жакын туугандарына жана ага байланыштуу башка адамдарга катталган (ар кандай класстагы 19 авто унаа, 15 турак жай жана 35 жер тилкелери) көп сандагы кыймылдуу жана кыймылсыз мүлктөргө ээлик кылганы аныкталды",- деп жазылат билдирүүдө.

Ошондой эле, курулуш компанияларда К.Досоновдун бир катар ири өлчөмдөгү каржылоолору бар экендиги белгилүү болгон.

Учурда УКМК тарабынан акча каражаттарынын жана мүлктөрдүн келип чыгуу булактарын аныктоо жана тактоо боюнча ыкчам-тергөө иш-чаралары улантылып жатат.