Ысык-Көлдө дайынсыз жоголгон 2 өспүрүм табылып, туугандарына өткөрүлүп берилди

Ысык-Көл облусунда жашы жете элек өспүрүмдөрдүн укуктарын, коопсуздугун камсыз кылуу, балдарга каршы укук бузуулардын жана кылмыштардын алдын алуу боюнча "Өспүрүм" аталышындагы комплекстүү иш-чара өттү. Бул тууралуу облустук милициядан билдиришти.

Иш-чарага 194 милиция кызматкери жана акыйкатчынын регионалдык өкүлчүлүгүнүн, билим берүү бөлүмүнүн, мамлекеттик экотехинспекциянын жана жергиликтүү өз алдынча башкаруу органдарынын алдын алуу кызматтарынын 132 өкүлү катышты.

Алар тараптан окубаган, кароосуз калган, ошондой эле иштеген жана кайыр сурап жүргөн өспүрүмдөрдү аныктоо үчүн 354 коомдук жайлар текшерилип чыкты. Текшерүү учурунда унаа жуучу жайда иштеп жатышкан 6 өспүрүм, түнү көчөдө жүргөн 32 бала, кайырчылык менен алектенген 2 бала кармалды. Ал эми дайынсыз жоголгон 2 өспүрүм табылып, туугандарына өткөрүлүп берилди.

“Өспүрүм” комплекстүү алдын алуу иш-чарасынын жыйынтыгы менен милициянын өспүрүмдөр менен иштөө инспекциясы тарабынан өспүрүмдөр арасындагы жана аларга карата кылмыштуулуктун алдын алуу боюнча билим берүү бөлүмдөрүнө 47, балдар иштери боюнча комиссиясына 22, ошондой эле башка кызыкдар мекемелерге 9 сунуш берилди.