Кочкордо 7 адам жаракат алган жол кырсыгы. Жабыркагандар Бишкектен Кочкорго келин алып бара жатышкан

Нарындын Кочкор районунда жол кырсыгына кабылгандар Бишкектен Кочкорго келин алып бара жатышкан. Бул тууралуу SUPER.KG порталына облустук жол кыймылынын коопсуздугун камсыздоо бөлүмүнөн билдиришти.

Маалыматка ылайык, анда Бишкек-Нарын-Торугарт унаа жолунда Honda-Stepwgn үлгүсүндөгү унаанын айдоочусу рулга ээ боло албай жолдон чыгып кеткен.

"7 адамдын үчөө ооруканага жаткырылган. Кырсыктын келип чыгуу себептери такталып жатат",- деди басма сөз кызматы.

Буга чейин 14-февраль күнү саат 07:03 чамасында Бишкек-Нарын-Торугарт унаа жолунда Honda-Stepwgn үлгүсүндөгү унаанын айдоочусу рулга ээ боло албай жолдон чыгып кеткен. Унаадагы жалпы 7 адам ар кандай жеңил жаракаттарды алышып, Кочкор райондук ооруканага "Тез жардам" кызматы аркылуу жеткирилгени маалымдалган.