Египеттин президенти калкын экиден гана балалуу болууга чакырды

Египеттин президенти Абдул-Фаттах Ас-Сиси өлкөдөгү төрөттүн жогорку деңгээлин негизги көйгөйлөрдүн бири деп атап, бир үй-бүлөнү көп дегенде эки балалуу болууга чакырды. Бул тууралуу чет элдик басылмалар жазып чыгышты.

Анын айтымында, өкмөт бул маселени катуу мыйзамдар жана чектөөлөр менен чечүүнү көздөбөйт. Калктын өсүшү мамлекеттеги резервдерге шайкеш келиши керек, анын кескин өсүшү экономикага терс таасирин тийгизет.

"Бир үй-бүлөгө экиден ашык балалуу болуу чоң көйгөй жана калктын тез өсүшү кооптуу экендигин баарына айтуу керек. Толук кандуу бага албаган, жумушка орноштура албаган баланын сизге эмне кереги бар? Кайра эле алардын 50 пайызы таштанды менен аралашып, шарты жок жерлерде жашайт", - деп билдирген президент.

Египетте жылына болжол менен 2 миллиондой бала төрөлөт деп болжолдонот. Өлкө президенти 100 миллион калкты камсыз кылуу үчүн Египетке жылына 1 триллион доллар керек экендигин жана өлкөнүн ички дүң өнүмү 250 миллиард долларды түзөрүн айтты. Учурда Египет калкынын саны боюнча дүйнөдө 14-орунда турат. Учурда өлкөдө 103 миллиондон ашуун адам жашайт. Алардын 20 миллионго жакыны сабатсыз деп эсептелет.