"1 миллиард 357 миллион сом". Ош шаарынын 2021-жылга карата жергиликтүү бюджети бекитилди

Бүгүн, 18-февралда Ош шаарынын 2021-жылга карата жергиликтүү бюджети бекитилди. Бул тууралуу шаардык мэриянын басма сөз кызматынан билдиришти.

Маалыматка ылайык, Ош шаардык Кеңешинин кезектеги XXXVIII сессиясында Ош шаарынын 2021-жылга бюджетинин жана 2022-2023- жылдарга божомолун, 2021-2023- жылдарга шаардын социалдык-экономикалык көрсөткүчтөрүнүн божомолун бекитүү жөнүндө маселе каралып, 2021-жылга Ош шаарынын жергиликтүү бюджети 1 миллиард 357 миллион 700 миң сом болуп бекитилди.

2021-жылга белгиленген бюджеттин чыгаша бөлүгү төмөндөгүчө:

• 22,2 пайыз жалпы багыттагы мамлекеттик кызматтар;
• 0,5 пайыз коргонуу тармагы;
• 11,1 пайыз экономикалык маселелер;
• 29,8 пайыз турак-жай жана коммуналдык чарба;
• 6,1 пайыз маданият жана спорт тармагы;
• 29,2 пайыз билим берүү тармагы;
• 1,1 пайыз социалдык коргоо тармагы түзүүдө.