Райымбек Матраимовду колдоо митингинин катышуучусу: "Эмне үчүн Дача-Су, Бишкек ЖЭБиндеги кычкачтар боюнча иликтөө чыкпайт?"

Бүгүн, 19-февралда Бишкекте бажы кызматынын төрагасынын мурдагы орун басары Райымбек Матраимовду колдоо митинги өтүп жатат. Митингге Нарындан бери келген апа Райым Матраимов пандемия учурунда элге, жети облуска жардам бергенин айтты.

"Мен Нарындан бери келдим. Райымбек Матраимовду көргөн эмесмин. Мен ал адамды кылган ишинен тааныдым. Пандемия учурунда Матраимовдон кыйын миллиардерлер үйлөрүндө жатканда ушул Матраимовдор элди ажалдан ажыратып калуу үчүн ар бир облуска жардам берген", - деди ал.

Мындан тышкары ал Райымбек Матраимов жөнүндө иликтөөлөрдү жасап жаткан журналист Али Токтакуновго кайрылды.

"Раимбек Матраимов бажыда болгону орун басар болгон. Ошол убактагы бажынын башчысы Кулматов жөнүндө эмнеге сөз болбойт? Эмне үчүн Дача-Суда адамдардын өмүрү кыйылды? Ал жөнүндө эмнеге кеп салбайсың? ЖЭБдеги кычкачтар жөнүндө эмнеге кеп салбайсың? "Кыргыз Газы" бир сомго сатылып кеткен. Ал жөнүндө эмнеге кеп салбайсың? Эмнеге Матраимовго эле асылып жатасың? Ал кыргыз элинин жерин сатыптырбы? Бул киши качып кеткенге толук мүмкүнчүлүгү бар болсо дагы качкан жок", - деди Нарындан келген жаран.

Учурда Райымбек Матраимовду колдоо митинги Биринчи Май райондук сотунун алдында уланууда.