Кыргыз-Казак чек арасында жүк ташуучу унаалардын кезек күтүп калышына мүчүлүштүк себеп болгону айтылды. Коңшу тарап маалыматты четке какты

Кыргыз өлкөсү менен Казакстандын чек арасындагы "Карасу" көзөмөл өткөрүү пунктунда ондогон жүк ташуучу унаалардын өтүүсү жайлап, кезек күтүү орун алды. Мамлекеттик чек ара кызматынан көзөмөл өткөрүү жайлары штаттык режимде иштеп жатканын кабарлады.

Маалыматта Казак тарап "Карасу" көзөмөл өткөрүү пунктундагы текшерүү комплексинин ишиндеги мүчүлүштүктөргө байланыштуу жүк ташуучу унаалардын өтүүсү жайлаганын билдиргени айтылат. Буга байланыштуу "Ак-Тилек" көзөмөл өткөрүү пунктунда 100гө жакын жүк ташуучу унаа кезек күтүп турганы кабарланган. Ал эми Кыргыз тараптан эч кандай чектөөлөр болбогону кошумчаланган.

"Чек арадагы өткөрүү пункттары кадимки тартипте иштеп жатат. Мамлекеттик чек ара кызматы убактылуу ыңгайсыздыктарга түшүнүү менен мамиле кылууну суранат", - дешкен мекемеден.

Ал ортодо коңшу өлкөнүн Улуттук коопсуздук комитетинин чек ара кызматы көзөмөл өткөрүү жайындагы мүчүлүштүк болгон деген маалыматты четке какты. "Текшерүү жайы иштеп жатат, эч кандай мүчүлүштүк жок", - дешет Казакстандын тиешелүү кызматынан.