АКШда тоңуп өлгөн баланын жакындары электр компаниясына каршы 100 миллион доллар өлчөмүндө доо койду

АКШнын Техас штатында бороондун кесепетинен тоңуп өлгөн баланын үй-бүлөсү Техастын Электр ишенимдүүлүк кеңешине (ERCOT) каршы 100 миллион доллар өлчөмүндө доо койду. Бул тууралуу чет элдик маалымат каражаттары жазып чыгышты.

Маалыматка ылайык, 11 жаштагы Кристиан Павон Техас штатындагы Конро шаарында бороондун кесепетинен электр энергиясынын массалык өчүрүүлөрүнөн улам жылуулуксуз жана жарыксыз калган трейлер унаасында түнөп көз жумган. Баланын үй-бүлөсү аны сууктан көз жумган деп эсептешет.

Компаниядан баланын өлүмүнө абдан кайгырганын, учурда соттук териштирүүлөр жүрүп жаткандыгына байланыштуу азырынча эч кандай түшүндүрмө бере албай тургандыгын билдиришкен. Ошондой эле алар жергиликтүү энергетикалык компаниялар электр жарыгын өчүрүп туура иш жасашкан деп эсептешет.

Белгилей кетсек, АКШнын түштүк штаттарында катталган катуу бороон 20дан ашык адамдын өмүрүн алган.
Катуу бороондун кесепетинен Техас шаары эң көп жабыркаган.