“Жарлык өлкөгө пайда эмес, тескерисинче зыян келтирет”. Байден Трамптын чет өлкөлүктөрдүн АКШга кирүүсүнө тыюу салган чечимин алып салды

АКШнын президенти Жо Байден мурунку президент Дональд Трамптын бир катар чет өлкөлүктөрдүн АКШга кирүүсүн чектөө жөнүндө жарлыгын жокко чыгарды. Бул тууралуу чет элдик басылмалар жазышты.

Маалыматка ылайык, Трамп 2020-жылы апрелде коронавирус пандемиясы учурунда "АКШнын эмгек рыногуна коркунуч жараткан иммигранттардын АКШга кирүүсүнө жол бербеген" жарлыкка кол койгон.

"Жарлык АКШнын кызыкчылыгын көздөбөйт. Тескерисинче, АКШ жарандарынын үй-бүлө мүчөлөрүнүн жана туруктуу жашоо статусунун ээлеринин үй-бүлөлөрү менен биригишине жол бербөө сыяктуу зыян келтирет" - деди Байден.

"Бул ошондой эле АКШнын экономикасында дүйнөнүн ар кайсы бурчунан талантка ээ болгон тармактарга тоскоол болот", - деп кошумчалаган Байден. Анын айтымында, Трамптын чараларына байланыштуу жылдык лотереядан АКШда жашоого уруксат алган адамдар (грин-карта) өлкөгө кире алган эмес.